No to'n fiéz las mocetas
de bucos ni de crabitos
que rondan cuan cay la tarde
per bosques y per caminos
sin cocho que los ature,
sin amo u zagal seguinlos.

Fillos de bruixa revieja
con capadó de tocinos,
son totóns, fllos del infierno,
sin más basemia ni oficio
que trová mocetas majas
a la tardada en camino,
lleváselasne a las covas
y coméselas en vivo
tornáus en demonios negros,
chibosos y cuernibizcos.

¡No to'n fiéz las mocetas
de bucos ni de crabitos
si no van, como é lo propio,
con cocho y zagal seguinlos!

• • • • • • • • • • • • • • • • • • •

Ya prou mediada la tarde
tray romero y tremoncillo
en el aire de la sierra
que baixa sin revolvinos.

Ya s'aduermen las fefez,
ya se despertan los grillos,
ya la lluna en prou creciente
sigue al sol en su camino
y trairá dispués la noche
como la tray fa mil sigllos.

Ya prou mediada la tarde
tornan solas al molino
tres molineretas finas,
rosadetas de carrillos,
vivas como palometas,
tres varetas de jacinto.

Trece añez tiene Angelines,
diez n'ha cumpllíu Amparito,
Bllanquita, la chicorrona,
ocho'n fa pa'l Santocristo.

Recogíus filos y agullas,
alzáus paños y "mundillos",
salen ya de la mayestra
entre barucas y chilos
llevánsene a casa sólo
risas frescas y tres llibros.

Que tienen que dase prisa
su mare les ha ben dicho,
y brenca d'entretenise
comén moras, fense anillos
u chugán al finalé
como zagaloz endinos,
pos cuan la tarde ya cay
y queda encara camino
salen lluego los totóns
de los olivás vecinos
y engañan a las mocetas,
tornáus bucos y crabitos,
llevánselasne a las covas
del barranco los Corbillos
y coménselas allí
con tenedó y con cochillo.

—¡Ojo, may que tos salisen
en bella güelta'l camino
y los veyesez sin cocho
ni pastó u zagal seguinlos!
¡Ñ'hay que santiguase aprisa
y rezale a san Calistro
Padrenuestro, Salve y Gloria
con el "Sálvame, ángel mío"!
—les dice y les ne repite
su mare cada maitino.

Pero a ellas que, criajas,
poco les sobra el juicio
les pueden las moras negras
mucho más que los avisos,
y, al dormí de las fefez
y al despertá de los grillos,
negros igual qu'el follín
un buco con dos crabitos,
sin cocho que los ature
ni pastó u zagal seguinlos,
les salen del olivá
y les cortan el camino.

Las tres más muertas que vivas,
las tres feitas un chovillo,
enarcadetas las tres
y per tierra los tres llibros,
sólo alavez se'n alcordan
que mamá les tiene dicho
que no se les feiga tarde
per parase pe'l camino,
que aparen muchisma cuenta
de bucos y de crabitos
los que van solos pe'l monte
sin cocho u pastó seguinlos,
sobre to cuan cay la tarde
y queda 'ncara camino.

—¿A don van estas mocetas,
estos tres pimpollos finos,
tan resaladas les tres
como may se'n habrá visto?
—les dice, roín, el buco
desimulán los caninos,
dulce com'un violín
y campechano y sencillo.

Le contesta la grandeta
(miedo rebozáu de frío,
careta coló de lluna):
—Pos tornán enta'l molino
que mos aspera mamá
pa preparamos "ganchillo"
u pa aduyale a molé
si l'han lleváu mucho trigo.
(Las otras ya'l Padrenuestro
l'empezan a san Calistro).

—Pa que no tos cansez mucho
—les dicen los dos crabitos—
tos podez montá en nusatros
que baixán a chotiá al río
y tos dixarén en casa,
que mos pilla de camino.
(Ya llegan a media Salve
Bllanquita con Amparito).

—No, no; que una vez montadas
cambiaríaz de camino
y, tirán enta las covas
del barranco los Corbillos
allí tos mos comeríaz
con tenedó y con cochillo.
No, no, que si mos montasen
cambiaríaz de camino.
(Las hermanetas ya 'stán
en el "Guárdame, ángel mío").
Lo cual que, rabioso'l buco
y rabiosos los crabitos
al querelas engañá
y no podé conseguilo,
les repllican sin embudias
mostrán llargos los caninos:

—Pos, si per las güenas no...
¡per las malas! ¡Da lo mismo!
¡¡Aquí tos mos comerén
y pa postre hasta los llibros!!

• • • • • • • • • • • • • • • • • • •

Pero las oracionetas
l'han llegáu a san Calistro,
y allí del mismo olivá
fa amanecé un llobo amigo
que se zampa hasta los cuernos
del buco y de los crabitos
tornánsene al olivá,
la tripa igual qu'un botico,
sin fe mal a las mocetas
que, recobráu el respiro
pasáu mesejante 'spanto,
tornan a seguí'l camino
y le contan a su mare
to lo que aquí queda dicho.

(Tres misas la siña Antonia
fa celebrá tres domingos,
las tres en ición de gracias
al glorioso san Calistro
que l'ha salváu las tres fillas
de mesejante peligro
con tal milagro que tiene
tan llanzáu a mosen Prisco
que ya ha fey que'y tome cartas
y y'acuda el siño Obispo).

• • • • • • • • • • • • • • • • • • •

Pos, dispueses d'este caso
qu'el llugá may heba visto,
per si 'stase el llobo en Francia
u con chordos san Calistro...
...¡¡may to'n fiéz las mocetas
de bucos ni de crabitos
que rondan, roíns, pe'l monte
sin cocho y zagal seguinlos!!