|
Fará diez u doce siglos
que un tal Colón va llegá
a unas tierras misteriosas
que no s'heban sabíu may.
Ye va llegá con un barco
que le va dixá una reina
dispués de cruzá una mar
rebutiente de ballenas.
¡Qué contentos se van fé
aquels trentaiséis barbudos
que teniban en la gola
feba tres años un ñudo!
Perque mil almas en pena,
en las noches de tronada,
llegán desd'el otro mundo
sin pará les chemecaban.
Y en las cllaras y serenas
los fantasmas de la mar
el barco les rodeaban
sin dixalo navegá.
Y tanto'spanto teniban
y lo teniban tan negro
que ni sabeban si'staban
encima la mar u en dentro.
(Llegán prous a rechazase
habé furtáu cuatro figas,
llimáu los dientes al burro
u soniáu con tal vecina).
¡Qué tremolales las garras!
¡qué frías entresudós!
y de día ¡qué acordase
de la olla y del purrón!
Ya se moriban de sé;
ya las cuerdas se comeban;
ya se santiguaban toz
cuan uno va gritá: —¡¡Tierra!!
Y tierra al fin van pisá;
le van dá gracias a Dios,
y asáus, a cuarto per barba,
van despachá nueve bous.
• • • • • • • • • •
• • • • • • • • •
Va saliles una chen
vestíus con prou pocas pllumas,
y el que pareceba alcalde
iba puerco de pintura.
Habllaban sabe Dios cómo;
tocaban muchos tambós,
y gritaban y brincaban
menos el alcalde toz.
Mandanles éste pará
va sacá una gran navalla,
y otras algo más chicotas
van sacá los que gritaban.
Como'ncara'staban fllojos
va pillales nuevo'spanto
(onque a la vez sin razón
perqu'encara'staban fllacos).
Y veyense ya en adobo
el veterano Colón
tirán mano del ecllipse
va apagá to un día'l sol.
(Que los ecllipses aquels
teniban templle y solera,
no com'estes de hoy en día
que ni duran casi brenca)
Y encendíu qu'el sol va sé,
el alcalde con la vara
venga siñalá unas crenchas
a la par que la navalla.
Que tirasen tierra aentro
pareceba que les diba:
van pos rezá seis rosarios
y van marchá deseguida.
Caminá que van fé un mes
con uno que los guiaba,
cerca d'una gran ciudá
van llavase toz la cara.
Lo mismo allí va saliles
mucha chen tocán tambós,
y cuan van llegá a la pllaza
en cllaro va quedá to.
Pos navallas allí un garcho
en cristiano pregonaba;
a truca de pllata y oro
ya casi no le'n quedaban.
Una desgana a Colón
per poco no le va dá
al trovase, de repente,
que l'heban roixáu la sal.
Lo que va dale, per mucho
y lo mismo repentina,
va sé una rabia que casi
le costa, al garcho, la vida.
Pos tal abrazo va dale...
que no va quedá prou cllaro
si no va queré'sturdilo
¡u no va queré afogalo!
Pero al tornale'l aliento
y en acabá de tusí
a'scuchá, toz, al misache
van sentase en un jardín.
Les va dí qu'allí'y llevaba
tres años menos un mes;
de cómo y'heba llegáu...
¡ixo eba cosa d'él!
Que no'staba pas tan viejo
y quedaba mundo'ncara
y en el mundo muchas chens
sin conocé la navalla.
Onque sí que les va dí
que lo que s'heba ganáu
no podrían carrealo
siete burros ben cargáus.
Sentín lo cual los misaches
se les va cambiá'l coló
y toz van abrí unos ojos
lo mismo que porgadós.
• • • • • • • • • •
• • • • • • • • •
Toz le preguntaban cosas
y él les va'mpezá a contá
de la vida de la chen
lo que l'heba chocáu más.
Treballá no treballaban
ni falta qu'ixo les feba
¡to se les criaba solo
de grasa qu'eba la tierra!
Onque per comé costillas
sí que cazaban bel bou,
y per cambiase de pllumas
bella aguíla de colós.
Y sólo a corré, a nada
y a chuegos así chugaban,
que brenca falta les feban
julepes, lligas u bancas.
May se sentiba un reniego,
may diban una mentira,
no se furtaban las cosas
ni alparceaban las vecinas.
No ñ'habeba sinvergüenzas,
ni tramposos ni ruíns,
chentota que desde siempre
campaba prou per aquí.
No sabeban una lletra
ni les feba brenca falta,
que cuan cerraban un trato
manteniban la palabra.
Cumplliban con la mandáu,
qu'eban justos los alcaldes;
d'abogáus no'n precisaban,
ni de cevils ni de cárcels.
Y el vestí como vestiban
de malo no diba res,
pos may, com'él ben sabeba,
s'esllisaba una mullé.
Nomás se tornaban brutos
cuan armaban bella guerra
per causa de bruixerías
que nomás els se sabeban.
—¡Pos sí qu'é rara esta chen!
—le va'nterrumpí Colón—.
Pero quizás con el tiempo
lo apañarén aquí to.
• • • • • • • • • •
• • • • • • • • •
—A yo me va trayé suerte
—va seguí'l misache dín—
el que al probá a pllantá un güego
un repente va tení.
Justo cada doce llunas
y desde más de mil años
el día que se cumplliban
se probaban a pllantalo.
Per creyé qu'en conseguilo
de la mar chens llegarían
que les trairían mil cosas
pa millorales la vida.
(Onque los bruixos veyeban
també prous sombras vení,
tals a lo milló polvóra...
baraixas... dinés... anís...)
Así que, cuan el zaguero
s'heba probáu a pllantalo,
salgo yo, pido llicencia,
me la dan y les ne pllanto.
Y van armá gran lifara
y cuernos me van posá,
lo cual como soy muy viudo
no va pareceme mal.
Y qu'el esmo va allumbrame
que també'stes santos cuernos,
de llucilos sin reparo,
pagarían mucho y güeno.
Y tal como va pensame...
Pero va saltá Colón:
—¡Hermano, tome respiro
que hora me toca a yo!
Pllantá un güego y que se tienga
no'l he llográu yo en diez años,
y m'estraña prou que otro
heiga teníu milló mano.
Sólo a medias ofendíu
el otro, sin dí palabra,
veyén un niedo en un pino
s'apreta algo más la faixa.
Y, con una mano atrás,
puya al pino, baixa un güego,
lo pllanta un poqué de golpe...
¡y encara debe'stá drecho!
Con lo que veyén que a to
el tremendo aquel le gana
escllama Colón chafau:
—¡Pos debe sé usté de Italia!
—¿De Italia yo?... Pos dispense.
¡Ni un mal ruello he picáu may,
may he pintáu ni la barca
y cantá canto prou mal!
Yo, y lluego fará cíen años,
va vení al mundo ¡¡¡en Graus!!!
|
