—¡Hola, hola, Pascualón!
¿Cómo así, tú por la iglesia?
  —Pos que viengo a confesame,
perque m'ha llegáu la fecha.
Pero, mosen ¿no m'habría
d'apañá otras penitencias?
  —¿...?
  —Mándeme que m'arrodille
en un trillo de pedreñas;
mándeme en la procesión
arrastrá siete cadenas;
mándeme llevá, a yo solo,
la peaina pa la fiesta;
pero, mosen, no me mande
que cumplla tres icións güenas
qu'el año resulta curto
pa tan fuerte penitencia.
  Y acabanse el año ha síu
que, pa torná con vergüenza,
he debíu cumpllí las tres
en lo que dura ixa vela.
  —¿....?
  —La primera güena ición
ha síu, mosen, la más seria.
  ¡¡El llunes yo va aguantame
de pizcá a la molinera!!
El llunes, cuan va vení
a tornamos la galleta
qu'estaba yo en el pallero
y no y'estaba la nuestra.
  Ella misma va'strañase
¡demonio de molinera!
  ¡Qué aguante me va fé falta
cuan va dime, ya en la puerta,
si no eba yo Pascualón
u si m'heba dáu bel reuma!
¡Qué aguante me va fe falta!...
  Pero ¡ya tiens la primera!
va dime yo aconformáu
y metíu ya en penitencia.
  —¡...!
  —La segunda va sé'l martes
cuan puyaban de la güerta.
  El burro desde fa meses
me proba prou la pacencia
(contra lo que "l'aconsejo"
con el mango la'straleta)
  Asinas que vey la burra
de la siña Filomena
y me se queda pllantáu
com'un mayo en la costera.
  (¡Otra güena ición a mano,
Pascualón, si l'aprovechas!)
  Y onque tripas y "consejos"
prou que me se retorceban,
yo pensán, cllaro, en usté...
¡venga fele cosquilletas!
  —¡¡....!!
  —Y, sin tiempo pa otra ición,
va sé anoche la tercera.
  Sí que la'ndina chilaba,
sí qu'hasta m'acometeba
(que may ha alcanzáu talento
ni en icións ni en penitencias);
pero yo, pos, refiáu
de qu'ha síu siempre ición güena
(según homes ben maduros
en años y en esperencias)
arreale a la mullé
per si un caso algo de lleña,
pos que va pillá a la Inacia
y con el ramal en reglla
como medio vitacristo
va acomodale en la'squena.
  —¡¡¡.....!!!
  —Justo, mosen, pa acudí
cumpllida la penitencia.
  —¡¡¡¡.......!!!!