| |
Contan los viejos más viejos
que ñ'habeba, siglos fa,
dos llugás que se llamaban
Santa María y Crespán.
Y va pasá qu'en los dos
tan brutos se van torná
que la pllaga van tení
y los va medio arrasá.
Y no podense refé
los pocos que van quedá,
unos se'n van í a Estadilla
y otros a Fonz van marchá.
Pero a Estadilla per drecho
los dos montes van pasá,
lo que com'una mazada
les va a los de Fonz sentá.
Tanto qu'en dos u tres siglos
las huegas al collumbrá
muy amargos no podeban
dixase de llamentá:
"¡Monte de Santa María!
¡monte, monte de Crespán!
¿cuán, del monte d'Estadilla,
cuán tos podrén arrancá?"
Ben seguros de que al fin
las habrían d'estrená,
los de Fonz las suyas huegas
pa tal fin van conservá.
Y va llegá que una vez
les va debé algo picá
y, ajustada ben la faixa,
van los montes recllamá.
Muchos padrinos muy gordos
mucho les van aduyá;
d'Estadilla toz en contra
la van casi atorrullá.
Que ya no se refaría
los de Fonz se van pensá,
y, per suyos ya los montes,
se van medio trestorná:
Venga al aire los padrinos,
las campanas venga alzá,
venga vivas a las gorras,
las botas venga valdiá.
"¡Monte de Santa María!
¡monte, monte de Crespán!
¡ya, del monte d'Estadilla,
tos hen podíu arrancá!"
La tierra, l'aigua y el aire
a Fonz los van fé pasá,
con llebres, barbos y garzas
y sobre to ¡¡¡la Central(*)!!!
Van lluego arrancá las huegas,
y al fin van podé pllantá
aquellas suyas qu'encara
teniban per estrená.
Pero refense Estadilla
se va a la josticia alzá
¡¡los de Fonz d'otra mazada
chafáus del to van quedá!!
Se van retirá las huegas
acabadas d'estrená
y las antes arrancadas
se van todas repllantá.
Y siempre desd'alavez,
las huegas al collumbrá
así los de Fonz s'escllaman
amargos encara más:
"¡Monte de Santa María!
¡monte, monte de Crespán!
¡ya, del monte d'Estadilla,
may tos podrén arrancá!"
|
