Desd'el molino
la llumbre llega
per dos alambres
que a casa entran.

Y el señorico
de la mayestra,
home que tiene
muchisma lletra,
mos diba un día
en la bodega
qu'estos alambres
per dentro llevan
un rayo amigo
que llisto'spera
a que lo manden
(sin qu'él se veiga)
a la bombilla
a que la'ncienda.

—¡Qué güena llumbre!
¡qué diferencia
con el candil
y con la vela!—
toz comentaban
mientras bebeban.

—No é brenca raro
que hasta l'agüela,
que del progreso
siempre se queixa,
del rayo éste
n'esté contenta.

(Pero el motivo
de que l'agüela
n'esté del rayo
tan satisfecha
no é pas la llumbre
que fa tan güena:
é ¡cómo mira
per casa nuestra!)

• • • • • • • • • • • • •

Un primo cuarto
nuestro d'Olvena
a comprá burro
va í a la feria.

Va fé güen trato,
pero a la güelta
el güen misache
va dase cuenta
de qu'"el güen trato"
la pata drecha
no l'amparaba
muy ben en tierra.

Poco más tarde,
d'aquí ya cerca,
veyén qu'el burro
más no'n podeba,
va'ntrá a dixalo
en casa nuestra.

(Y rabia, miedo,
gitano, suegra,
cochillo y Francia
en fuerte mezclla
iban dixanle
la gola seca)

Como tronaba
y... no quereba
qu'en casa suya
pasasen pena,
va chitá trago
y cara a Olvena
va seguí solo
(onque a la cuenta
sigue per Francia
desde tal fecha)

• • • • • • • • • • • • •

Del burro, lluego,
va dí l'albeita
que forniguilla
aquello eba;
que le'y posasen
sal, vino y menta,
y en cuatro días
la pata güena.

—¡San Bllas mos guarde!—
salta l'agüela,
la cara bllanca
como la cera
y las dos manos
en la cabeza.

—¡Como si nada!
¡sal, vino y menta!...
¡Y en cuatro días
quizás dos tuertas!...
¡¡La nuestra ruina
será esta bestia!!

• • • • • • • • • • • • •

—Penas ben gordas
he pasáu, Pepa;
pero no guaires
más gordas qu'ésta.

Gracias qu'el rayo
va dase cuenta
y del alambre
va brincá afuera
contra l'endino
que media tuerta
a media gola
ya se veyeba.

Razón be tiene,
com'hay Dios, Pepa,
el señorico
de la mayestra
al dí que cría
la llumbre ésta
un rayo amigo
llisto de veras.

Cuan otro'n críe
ya verás, Pepa,
cómo la choven
mos va más drecha.

• • • • • • • • • • • • •

Así la cosa
conta l'agüela
que, cuan los truenos
más gordos eban,
al lau pasaba
entrán la lleña.

Lo que no conta,
perque pa ella
los suyos tragos
no importan brenca,
é que, ixufrada
per la centella,
tiesa y verdosa
va cayé a tierra,
y que al trovala
y fele'sfregas
(per si per ixas
no'staba muerta)
va, y, de repente,
salta tremenda
veyén el burro
seco al lau d'ella:
—¡Este "pogreso"
ya tray más cuenta!