En un llugá prou talcual
de la Ribagorza baixa
va pasá una vez un caso
rebutiente de sustancia.

No va pasá en Calasanz,
ni en Olvena, ni en Alíns...; (*)
pero veigán al asunto
sin sacá res ni añadí.

D'este llugá prou talcual
un vecino prou tremendo
con l'alforcha y con el burro
marchaba a comprá vencellos.

Pero el burro (no el vecino)
tan lligero caminaba
qu'hesen llegáu los vencellos
las trilleras acabadas.

Venga'stiróns, venga'spientas;
venga consellos "a tocho"...
¡res, que de las cuatro patas
pareceba'l burro coixo!

Y el tremendo perfiaba:
—Si fuese yo d'Estadilla,
pa convencé a este focín
¿qué cosa descurriría?...

Y se mete a descurrí.....
¡¡y trova la milló cosa!!
Estregále un coralé
justo debaixo la coda.

Pero no va medí ben,
y tanto le'n va'stregá
qu'el animal va salí
poco menos que volán.

—¡Para, para! —le gritaba—
¡que no te puedo seguí!....
(el burro llegaba ya
cerca la carrasca Chil).

Y s'escllamaba'l tremendo
(las manos en la cabeza):
—La nuestra, si torno solo,
me dará un estrechopuerta.

Pero tan "dulce"'speranza
va allumbrále en un istante:
—¡¡Dos coralez que me quedan
encara podrán salváme!!

Y onque no teniba coda
va sabé trováse'l punto,
y en el punto va'stregáse
los dos coralez a pulso.

Ni atacáse va podé.
Chilán como mil herejes,
la camisa, y más, al aire
va salí com'un codete.

Y a l'altura d'Estadilla
va alcanzá... y va pasa al burro
(perque si se refrenaba
hasta le'y saliba fumo).

—¡Ya irás venín, Perdigón,
que no puedo sujetáme!
¡Caso qu'en Balbastro pueda
al puente saldré a'speráte!

Así va gritále al burro
justo al tiempo de pasálo;
lo qu'el burro se va dí....
per ahora me lo callo.

• • • • • • • • • • • • • • • •

Pos, el año la picó,
en un llugá prou talcual,
sin sacá res ni añadí,
esto e lo que va pasá.

Lo que posa ben en cllaro
que to requiere su mida,
se trate de coralé,
se trate de cantá en misa,
se trate de fé romances
tremendos contra Estadilla.