Algún bozudo(*) que fa
romances medio somordos
tira piedras a Estadilla
como qui las tira a un cocho.

  Al romancero de Fonz
empezán per dile aquí
que va fé igual fa prous años
Victor Torrente Cosín.

  Que va contestale Clleto
Torrodellas Español
en un romance qu'encara
l'escuece lo suyo a Fonz.

  Que si may l'hese leíu
y aprendéselo querese,
le'n mandarén, si da'l nombre,
perque los suyos no'n tienen.

  Que pa fésene la burlla
se l'ha de sabé más llarga,
perque podría pasale
com'a aquel que va í per llana.

  Onque, si con ixo'spera
llegá bel día a sé alcalde,
no mal camino é tirá
piedras qu'a Estadilla alcancen.

  Pero, si no'spera selo
¿per qué, de menos mal templle,
no se le'scllama a San Bllas
que pa San Bllas no les neve?...

  Que les conserve Cofita,
que güen provecho les fa,
y que "mercedes" d'algunas
no se les acaben may...

  Que les ensanche las calles
y les ne torne más pllanas,
y les llibre de más pleitos
sobre to si no se ganan...

  ¿Querrá sacase la'spina
que debe tení'ncllavada
perque no tienen las huegas
to lo llejos qu'esperaban?

  (Que a cualquier chocolatero(*)
le faría mal tragá
chocolate que tomase
forastero en la Central).

  ¿Será quizás perqu'en Fonz
las más majas y cumpllidas
a la hora de casase
se casan en Estadilla?

  (Mientras que se'n van a Fonz
las pocas estadillanas
que per salí de tionas
en cualquier llugá se casan).

  ¿Será perqu'en Estadilla
hasta al alcalde más bruto
pa mandá ben l'ha faltáu
ni quizás el canto un duro?

  (Mientras qu'al revés en Fonz,
que el que les sale más güeno
hasta a los más refocíns
les fa merecese el cielo).

  Y si e per bella otra cosa,
u quizás per todas chuntas,
el caso e qu'el romancero
pa divertise mos busca.

  Pos habría de í veyén
el romancero de Fonz
que, como cocho, Estadilla
e cocho prou mordedó.

  Y que, reñí per reñí,
mos gusta a romance llimpio
tanto u más que cuan, zagals,
las tardes de los domingos
iban a piedrada llimpia
salín a mitá camino.